Шілденің бірінші жексенбісі қазақ халқының киелі де қасиетті музыкалық аспабы Ұлттық домбыра күні болып жарияланды.
“Nur Otan” партиясы және Ғарифолла Құрманғалиев атындағы облыстық филармониясы Тәуелсіздіктің 30 жылдық мерекесі қарсаңында «Ұлттық мұра» жобасы аясында киелі аспапты дәріптеу арқылы ұлттық мәдениет, өнер туындыларын, Қазақстан халқының рухани құндылықтарын, ұрпақтар сабақтастығын және тарихқа деген құрметті насихаттай отыра, Қазақстанның әрбір азаматының рухани санасын жаңғырту мақсатында кәсіпқой және әуесқой күйші-домбырашылармен бірге онлайн челленджді бастайды.
Күй өнері – қазақ халқының ең құнды, бағалы мұраларының бірі. Қаны мен жанында күй ойнаған ұлтымыз тума таланттарға кенде емес. Сондай дарын иелерінің бірі – қазақ өнерінде өзінің өшпес ізін қалдырған күйші, композитор Дина Нұрпейісованың туғанына биыл 160 жыл толды. Осыған орай Ғ. Құрманғалиев атындағы Батыс Қазақстан облыстық филармониясы Дәулеткерей атындағы қазақ халық аспаптары оркестрінің домбырашылары мен облыстың белсенді партия жастары және жасотандықтар күйшінің «Науысқы» күйін орындап барша қазақ еліне жолдайды.
