Осыдан 55-жыл бұрын Ақжайық өніріндегі жоғары кәсіби деңгейдегі дара шығармашылық ұжым болып саналатын Батыс Қазақстан облыстық филармониясы халқымыздың музыка өнерін кеңінен дамыту және насихаттау мақсатында Қазақ КСР Министрлер Кеңесінің 1966 жылғы 25 қаңтардағы №66 қаулысымен құрылған болатын. Филармонияның 1989 жылы Орал қаласындағы ең көрікті де сән-сәулеті ерекше, 1900 жылы бой көтерген саудагер А.Каревтің үйіне орналасуы айрықша сый болды. Бұл, өңір мәдениетінің өркендеуіне, соның ішінде ұлттық өнердің дамуына игі ықпалын тигізді. Еліміз  тәуелсіздік алғаннан кейін 1996 жылы ҚР Мәдениет және ақпарат министрлігінің шешімімен Батыс Қазақстан облыстық филармонияға ақиық әнші, Қазақстанның халық әртісі Ғарифолла Құрманғалиевтің есімі берілді. Өнер сүйер ағайынды, құрметті көрермендерімізді сүйікті филармониямыздың 55-жылдық мерейтойымен құттықтаймыз!